Matanglawin Ateneo

Bilang Opisyal na Pahayagang Pangmag-aaral ng Pamantasang Ateneo de Manila, hangarin ng Matanglawin Ateneo na tumaliwas sa obhetibong pamamahayag at laliman pa ang pagninilay sa balita nang sa puso at katotohanang walang kinikilingan. Sa ganitong pamamaraan, sinisikap ng publikasyong paulit-ulit na mulatin ang sarili sa mga suliraning panlipunan, at kaakibat nito’y magpamulat din ng mga kapwa mag-aaral at karaniwang mamamayan. Gamit ang malaya at mapagpalayang pamamahayag, taimtim na pinapagaspas ng Matanglawin Ateneo ang kaniyang pakpak upang tuluyang mapawi ang madidilim na ulap na bumabalot sa katotohanan at humihimok para mabulag at magbulag-bulagan ang mga tao. Sa harap ng isang mapanghamong panahon, hindi hangarin ng publikasyong magsulat at kumatawan bilang boses ng mga bagkus mayroon na silang sariling boses at paninindigan—pilit lamang itong sinisiil ng mga makapangyarihan. Sa gayon, isinasabalikat ng Matanglawin Ateneo ang tungkuling makinig sa hinanakit ng mga biktima at gawin ang lahat ng kanilang makakaya upang lubos na mapaigting ang boses at kuwento ng masa. Itinataguyod nito ang pamamahayag na hindi lamang tumitiktik sa katotohanan kundi tumatanglaw rin sa masalimuot na buhay ng biktima bilang isang tao at hindi numero o istatistikang ibinabalita.