Souriali

Listen to us on Follow us on Twitter https://twitter.com/RadioSouriaLi on TuneIn : http://tunein.com/radio/SouriaLi-s183397/ Description فنجان القهوة، إبريق الشاي، أو كاسة المتة كانوا يجمعونا بشكل شبه يومي مع الناس يلي منحبهم كنا نحكي عن كل شي ببالنا، همومنا، مشاكلنا، طلعاتنا، قعداتنا، و حتى عن غرف نومنا و مطابخنا كنا نحكي هموم، و وظايف، و شغل، و مصاري، و رياضة، و دين، و سياسة، و شي بطعمة و بلا طعمة كنا نحكي أحياناً بصوت عالي، و أحياناً "وشوشة" و همس، و أحياناً نفهم على بعض من دون ما نحكي لأنو ما نسترجي دارت الأيام، و شاءت الأقدار، و تعددت الأسباب ، و و و. بس إنو ما عاد قدرنا نجتمع مع بعض متل الأول، ولا نحكي مع بعض متل الأول. و من هاد المنطلق، إنخلقت هي الساحة "السوريالية" حتى تكون متنفس جديد إلنا. مكان نجتمع فيه و نحكي "بلا حدود و بدون قيود" عن اليوم و بكرا، نحكي عن أخبار الجبل و الوادي، عن الصحرا و عن البحر، نحكي عن الضيعة وعن المدينة، عن الداخل و عن الخارج نحكي عن البلد، و بنت البلد، و إبن البلد، و أطفال و ختايرة البلد، و عن حالنا نحكي عن وجعنا، و خوفنا، و قلقنا، و الأهم من هيك إنو نحكي عن أملنا و عزمنا و اصرارنا على حب بلدنا يعني باختصار. نحكي من سوريا عن سوريا ركوة القهوة ع النار رح تجهز، تعالوا متل ما إنتوا، و خدوا راحتكم ع الآخر، و خلينا نتنفس و نحكي مع بعض، و نسمع لبعض بس خلينا نكون محضر خير و أمل ، حتى "نصير يوماً ما نريد"