Udalbiltza

Euskal Herriak, munduko beste herrialde guztiek bezala, burujabea izateko eskubidea du. Eskubide hori gauzatzen dugun bitartean, asko egin dezakegu nazioa eraikitzen joateko, izan garenari eta izan nahi dugunari forma instituzionala emateko. Asko egin dezakegu norbanakook eta asko euskal nazioaren alde egiteko prest gauden erakundeok. Horietako bat da Udalbiltza, naziogintzarako udal agentzia, Euskal Herria nazio gisa hartzen duen erakunde publiko bakarra. Udalbiltzak ideietan ere eragin nahi du, nazio erreferentziak lantzea garrantzitsua baita, baina, batez ere, Udalbiltzak arlo praktikoan landu nahi du burujabetzan oinarritutako eraikuntza nazionala, Euskal Herriko komunitateen arteko sareak, ehunak eta harremanak modu ukigarri, erabilgarri eta sendo batean eraikiz. Bizi daitekeen eraikuntza nazionala egin nahi du Udalbiltzak, praktikoa, herritarren bizimoduaren parte bihurtuko dena; hezkuntza, kultura, energia, zaintza, elikadura eta bestelako arlo guztiak bilduko dituena; herri bat Herri egiteko jardun eta harremanen sarea eraikiko duena. Jaso nahi dugun herri-eraikin hori sortzeko oinarri egokia da udala, herritarrengandik hurbilen dagoen egitura instituzionala baita. Horregatik, Udalbiltza udaletatik abiatzen da eraikuntza nazionalerako oinarriak eta egitasmoak lantzeko orduan. Letra xehez idazten diren herriek egiten dute letra larriz idatzi nahi dugun Herria. Euskal Herria. Burujabetza ukatzen diguten horiek euren egituretan eta erreferentzietan urtu nahi gaituzte. Guk, sustraiei eutsiz, adar berriak emango dituzten egitasmoak abiatu nahi ditugu, naziogintza sendotu nahi duten udalen artean elkarlana bultzatuz. Udalbiltzak behetik gora sortzen diren egiturak bultzatu nahi ditu, ikuspegi nazionala dutenak, baina herri txikietan ere bizi daitezkeenak, herriei bizia emango dietenak, herritarrekin eta herriekin batera jasoak. Udalbiltzak egia bihurtzen diren ametsak bultzatu nahi ditu, eta zuk ere parte hartu dezakezu.