Vanylven Kommune

Vanylven kommune ligg ved kysten heilt sør i Møre og Romsdal, på grensa til Vestland fylke. Er ein del av Sjustjerna på søre Sunnmøre, som består av Sande, Herøy, Ulstein, Hareid, Ørsta, Volda og Vanylven. Vanylven er kommunen med det store mangfaldet, både når det gjeld vêr, natur, næringsliv og menneske. I vakre Vanylven, som for oss er verdas navle, kan vi by på alt frå indre dalstrøk med irrgrøne lier til ytre kystlandskap, med vêrharde bårer og nydelege kveldar med dansande nordlys på himmelen. Her kan ein oppleve alle fire årstider på ein dag, og det er mogleg å klare fire fjelltoppar over tusenmeteren på ein og same tur. I ferda gjennom kommunen kan vi framleis by på kufeller, og sjølv om vi er takksame for å sleppe å stå i bilkø, så kan det hende vi må slakke på til Dagros og Dolly finn det for godt å reise seg frå vegen og rusle til sides. Her lever vi av gruvedrift, vi er sjølvberga av gode landbruksvarer og fiskerike fjordar. Lokalprodusert fisk har blitt topprangert på andre sida av jordkloda og vi har forfattarar som har gitt ut bøker i eit tosifra tal andre land, som også har motteke høgthengande prisar for kvaliteten. Her får du dei flottaste designmøblane til skipsindustri og studenthyblar, vi har innovativ brubygging og vi sel energisparande produkt til hyttemarknaden i heile Norge. I Vanylven finn du kopi av Il Tempo Gigante og Pelle Politibil, og du kan gå inn døra hos rørleggaren, og kome ut same døra med nyinnkjøpt sjal eller bukse. Om du er interessert i dykking, golf, historie, taekwon-do, eller vil lære om malarkunsten, så har vi moglegheitene.